DJ Bull, aurten, Irunberri tabernan
Asteazkenean, atsedena hartu nahi ez duenarentzat, DJ Bull entzuteko aukera edukiko du Irunberri tabernan, gaueko 22:00etatik aurrera.
Ostegunean, Kuadrilla Egunean, gauean, Kaparrak talde “atxabaltarra” taularatuko da, runba erritmoko kantuekin. Eta, ondoren, DJ Naza arituko da, plaza girotzen.
Santa Krutz egunean, ostiralean, Elektropottotte taldeak girotuko ditu kaleak; iaz, ikusmira handia sortu eta jendetza batu zuen kaleetan.
Nikotina eta Hofe 4:40, ostiral gauean
Gauean, jaietako talde ezagunenak izango dira protagonista: lehena, rap, reggae eta dancehall musika motak uztartzen dituen Nikotina taldea izango da. Ondoren, Hofe 4:40 musikari nafarrak lehertuko du plaza, underground kutsua duen musika elektronikoarekin.
Larunbatean ere ez da aspertzeko astirik izango. Arratsaldean, Zumea plazan, Bomber, Ibandevice eta Shaker DJak musika jarriko dute. Gauean, berriz, erromeria eta techno-elektronika musika motak izango dira protagonista, Muxutrukekin eta DJ Fresa Morangorekin.
Azken egunerako gogotsu dagoenarentzat ere bada zerbait gehiago; sagardo-txapelketaren amaieran, Babarrunba taldea izango da Zumea plazan.