2018-04-27

Udaberria

(Doinua: Ikusten duzu goizean)

1.- Aurtengo udaberria,

Aste Santuk ekarria,

askoren alaigarria,

bere bitartez kenduko al dira

gosea ta egarria?

Badator lore berria,

emaitz-toki basarria;

itxaropen jatorria.

 

2.- Udaberriko legezko,

eman deiogun baiezko,

izan dedin maiorazko,

gorputz-animak sendatutzeko

or etorri zaigu Pazko.

Da zeiñek ez du gogozko?

Amorioz gazte asko;

ori ere bearrezko.

 

3.- Nunnai txori kantaria,

ain langille ugaria,

nor ote du gidaria?

Jaun zerukoak gu alaitzeko

bialdutako saria.

Orrelako oparia,

ez ote da miraria?

Egunaren ataria?

 

4.- Badute kantu ederrik,

eta ez dira alperrik,

orretan ez da okerrik,

besteak-beste, beren tratoa

kukua ta txantxangorrik,

Legeak duauzkate jarrik,

izadi onek ezarrik;

ez dabiltz kantuz bakarrik.

 

5.- Kukuak alper fama du,

txantxagorria ondradu,

ama ordezkoan gradu,

utsa litzake umea azita

soldatik izango balu.

Ainbat lan, denbora galdu,

kukurik ez da azaldu;

kantuan nahiko lan badu.

 

6.- Ikasbide bat zabala,

sarri ikusten dedala,

ain txori txiki apala,

kukuak eta txantxangorriak

munduan asko gerala.

Batzuk kantuz dute gala,

natura gizartea ala,

alkarren bear dirala.

7.- Kukua beti da alai,

nola aste-egun da jai,

da egun-sentian ernai,

jendea kantuz alaitzearren

lanean ez du asi nai.

Jateko bildutzen du bai,

ez da galduko nolanai;

errez joango da noranai.

 

8.- Sanjoanak arte guregan,

aurrez esan dedan eran,

mendi goietan da beran,

andik aurrera beste norabait

aldegingo digu egan,

Nora joanak aukeran,

txit entzunak nola geran;

Afrika joaten ote dan.

 

9.- Komeniko da joatea,

amaiera ematea,

denbora badu betea,

da baliteke beste nunbaite

bere zai an egotea.

Guk nai degu izatea,

noski urrengo urtea;

berriz etorri zaitea.

 

10.- Au da gure izaera,

beti bagoaz aurrera,

konturatzen da norbera,

udaberria ere joan zaigu

kukuarekin batera.

Danok degu bukaera,

auxen da nere galdera:

noiz artean ote gera?

 

11.- Nunnai gerraz naigabea,

da negarrezko abea,

gizon askoren legea,

aientzat oso urruti dago

udaberriko lorea.

Guregan bada aldea,

eskertu danon Jabea;

zer degu gauza obea?

 

12.- Izan gaitezen fededun,

lenago ori bagendun,

al bada aurrera jardun,

azkenik ez dun udaberri bat

guztiok izan dezagun.

Jauna egiguzu lagun,

ez dakigu noiz eta nun;

ea zoriona degun.

 

Iruzkina Idatzi

Captcha image